总算带俚出去仔，弄出格套花头来格呀。”玉莲道：“格是勿能实梗说格，登勒屋里，作兴也要生病格，故歇呒啥别样，快紧搭俚收捉，外修里补，安见得来勿及介？”宝玉道：“奴也是格格意思，格落要紧煞转哉，不过请落里格郎中好？俚格病重极勒海，推扳点格郎中吃勿光格。”阿金接嘴道：“要末仍旧去请陈笃卿来看罢，眼睛门前，终算俚最有名气点。”宝玉道：“奴前头请过歇俚，吃仔俚格药，勿好，亏（读区）得换仔金宝山勒好格，啥落故歇板要请俚介？”阿金道：“金宝山是女科格专门，格落我仍想请陈笃卿呀，作兴药有药缘，吃仔倒对格也未可知，且得试试看。”宝玉听他一说，却也想不出别个，只得依允，立刻就差相帮去请，不表。

　　仍说宝玉差人请医后，想起家中近日生意如何，便向玉莲等细问，玉莲答道：“近来着实呒啥，日日有两台酒，有两桌和格，而且新添仔两个户头：一个做月仙妹子格末，姓屠，是汉口人，场面野阔笃，来仔三四埭，已经摆过仔两转双台格哉；一个做奴格末，就是前头要做林黛玉，托姓袁格朋友出面，邀贺老去吃酒格，奴转来告诉歇阿姆，阿姆终想得出格勒。”宝玉道：“格件事体，勿长远勒，阿就是说格湖州人，开丝栈格小老板，姓黄格佬？”玉莲道：“一点也勿差，就是俚呀！酒未摆过仔一台，和倒碰仔三场哉。”宝玉道：“阿晓得俚搭黛玉，到底阿有花头佬？”玉莲道：“奴也问歇俚格，据说俚是搭黛玉要好得头才割得落，只少得讨俚转去快哉，难末奴勿相信，对俚说：‘既然实梗末，哪哼夹忙头里，想着到奴搭来哉？’俚说道：‘越做得多，场面越阔，起码总要三四个，叫起局来便点，呒不做煞一家格。况且黛玉是大先生，是小先生，就算登勒一淘，俚也勿见得会吃醋格。倒说格套闲话，阿是拿我讨厌，我来呢啥？’奴听俚着末两句，倒只好搭俚赔勿是，难末算完结，响啥哉。”宝玉道：“格格姓黄格，据奴猜上去，实头是格瘟生笃，铜钿银子勿在乎，滥使滥用，要骗点俚倒容易格，不过倪终有限，至多一千八百末哉。将来黛玉末大吃牢，俚板上黛玉格当，讨俚转去，弄得一塌糊涂，人财两空，赛过替俚(仔一个浴，连谢才弗谢一声格勒。唔笃勿相信，伸长仔头颈看末哉，板有实梗格一日格。”玉莲等皆点首称是。

　　芸台道：“奴格搭仍旧是格班老客人，仅不过日日勿脱空罢哉。”

　　母女们谈谈说说，不觉已到午牌时候。请医生的鳖腿早来回覆，说：“郎中要五下钟来得勒。”所以眼前宝玉也无法可想，吃过中饭，亲自下楼去看了一趟。因阿二今日受马车颠簸，未识病势可

　　请收藏：https://m.bokan9.cc

（温馨提示：请关闭畅读或阅读模式，否则内容无法正常显示）